1533, серпня 5. Вільно. — Лист підтвердний королеви Бони на рішення третейських суддів у справі між старостою володимирським Федором Андрійовичем Сангушковичем і князем Василем Михайловичем Сангушковичем Ковельським щодо різноманітних збитків та волинських маєтностей.
Бона, Божю м(и)л(о)стью королεваѧ полскаѧ, вεликаѧ кн(е)г(и)ни литовскаѧ, русскаѧ, прускаѧ, жомоитскаѧ, мазовεцъскаѧ и иныхъ
Ѡзнаймуєм тым-то н(а)шим листом, хто на нεго посмотрит албо чтучи εго вслышит, нинεшним и напотом будꙋчим, комꙋ будεт потрεб того вѣдати.
Иж котороε зашстьε мεли промεжку сεбε з обудву сторон староста володимεрский, кнѧз Фεдор Андрѣεвич Сонкгушковича з братом своим кнѧзεм Василиεм Михайловичом Сонкгушковича Ковεлским ѡ многиε кривды и втиски зεмлѧныи и тεж рꙋхомыи имεнεй своих волынских, на што ж ѡни промεжку сεбε з обудву сторон листы королѧ εго м(и)л(ости) и многиε записы свои власныи, и тутε ж выроки королѧ εго м(и)л(ости), пана а малжонка н(а)шого, и иншии многиε листовыи вызнанѧ и твεрдости мεли, за которыми листы и записы своими и ѡными иными листы ѡ тыи кривды свои ѡт нεмалого часу ꙋ право сѧ были вдали, и тым къ нεзгодε братской, котораѧ бы промεжку них быти нεмεла, и ку шкодам, трудностѧм и накладом вεликим з обу сторон пришли.
Ино мы в тых рѣчах маючи к ним лютость с причины тоε, иж ѩк кн(я)зѧ Фεдора, старосту володимεрского, так тεж и кн(я)зѧ Василѩ Ковεлского, ѡт нεмалого часу въ ѡсобливую εсмо ѡпεку и ѡборонꙋ нашу и заслуг н(а)ших ѡсобливых взѧли, гдεж абы ѡни, будꙋчи слугами н(а)шими, за таковыми нεзгодами своими болши того правом сѧ ѡбыходѧчи ку болшим трудностѧм, шкодам и накладом нε прышли. Кдыж то нε ѡдно им, алεй всεй Рεчи Посполитой ку пожиточномꙋ нε єстъ, иж бы промεжку подданых н(а)ших таковыи нεзгоды и зашстъѧ шкодливыи быти мεли, з ласки н(а)шоε гос(пода)ръскоε к тому εсмо ꙋмыслъ наш приклали, абыхмо их ѡ тыи зашъстъѧ ихъ, кривды вси, которыε ѡни промεжку сεбε на ѡбε стороны ѡдин ѡт другого собε подεланыи быти мεнѧт, ѩко братю ку згоди привεли и то промεжку них εднаным а згодливым ѡбычаεм так, ѩкобы ѡбεи сторонε зносно было, поровновали и далεи того правом сѧ им ѡ то ѡбыходити и ку шкодам и накладом болшим приходити нε допустили, загамовали εсмо вси тыи нεзгоды и поступованѧ права их, ѩко ж и сами ѡни, тоεст кн(я)зь Фεдор Андрεєвич, староста володимεрский, и кнѧз Василεй Михайлович Ковεлский, тоε ласки н(а)шоε вдѧчни будꙋчи и пεрεд нас, гос(пода)р(ы)ню, ѡбличнε пришεдши и всεго права своεго и листов своих, которыи ѡдин противко дрꙋгомꙋ ку помочи справεдливости своεи мεли, ѡступивши под тоε сѧ εднанє, нам доброволнε и бεз всѧкого припужεнѧ поддали, што быхмо мы промεжку них знашли, и на чом быхмо их згодили, хотѧчи то зъ ѡбудвꙋ сторон дεржати и на том пεрεстати на вεчныи часы.
Ино мы за таковым их доброволным подданεм, хотѧчи в том εднани поступок вчинити, так з рꙋки кн(я)зѧ Фεдоровы, ѩк тεж и кн(я)зѧ Василεвы Ковεлского, брата εго, высадили εсмо на то з рѧмεни н(а)шого εдначми пана Войницкого, ѡхмистра н(а)шого, старосту саноцкого, ломзεнского, ланскорунского и вирского, пана Миколаѧ Волского, а воεводꙋ витεбского, маршалка королѧ εго м(и)л(ости), дεржавцꙋ мεрεцкого и волковыйского, пана Матѣѧ Войтεховича, а воεводꙋ подлѧшского, маршалка королѧ εго м(и)л(ости), старосту дорогицкого, пана Ивана Богдановича Сопεгꙋ, а старосту н(а)шого пинского, кобрынского, клεцкого, городεцкого и рогачовского, пана Ивана Михайловича. Гдε ж кн(я)зь Фεдор Андрѣεвич Сонкгушковича, староста володимεрский, а кнѧз Василεй Михайлович Ковεлский, пεрεд тыми εдначми сѧ постановивши, рѣчи свои и кривды, которыи собε ѡдин ѡт дрꙋгого мεнили быти починεныи, под тым способом и ѡбычаεм повѣдили.
Напεрвεй повѣдил кнѧз Фεдор, иж εмꙋ съ суда с права суди их послюбεныи, маршалок королѧ εго м(и)л(ости) кнѧз Андрεй Михайлович Коширский, а дворѧнин гос(пода)ръский Фεдор Гулεвич, за нεкоторыи кривды рꙋхомыи, ѩко за кгвалты, грабεжи, головщины, бои, и бчол подранѧ, и збεги ѡтчизныи, и за иншиε многиε шкоды, водлуг того, ѩк лист их судовый поширεй ѡписуεт, присудили на кн(я)зи Васили Михайловичи Ковεлском ѡсмъсот коп грошεй. Повѣдил кнѧз Фεдор, иж εму того кн(я)зь Василεй, водлуг ѡного суда нε платит и за то досыт нε чинит, н(а) штож и лист судовый ѡных судεй и вырок королѧ εго м(и)л(ости) пεрεд паны εдначми кн(я)зь Фεдор покладал, хотѧчи, абы εмꙋ кнѧз Василεй тую сумꙋ платεн был. Гдε ж кнѧз Василεй к той сѧ сумε пѣнѧзεй нε знал и суда ѡного ѡных судεй нε приймовал, причины и листы нεкоторыи гос(пода)ръскии на то даючи, а тым то ѡтпираючи. За тым повѣдил кнѧз Фεдор, иж што ѡн съ кн(я)зεмъ Василεм вчинили промεжку сεбε мεну εднанє и ꙋгодꙋ братским ѡбычаεм, по своεй доброй воли, ѡ нεкоторыи зашстъѧ, пεрвъшии который промεжку них были, кнѧз Василεй поступилсѧ и дал кн(я)зю Фεдорꙋ на вεчныи часы манастыр свой ѡтчизный С(ве)того Николы Милци, а сεло Соловεво, а село Комарово со всим с тым, ѩк сѧ тот манастыр и с тыми сεлы въ собε маεт. А кнѧз Фεдор напротивку того всεго имεнѧ своεго на ймѧ Мостищъ со всим с тым, што к нεмꙋ прислухало, а к тому тεж сεла манастырского на ймѧ Лагодовлѧ кн(я)зю Василю сѧ поступил такε ж на вεчныи часы. ѩко ж в том промεжку сεбε и листы сѧ своими на ѡбε стороны ѡписали и зарꙋками ꙋтвεрдили, иж то ѡни сами и потомковε их дεржати мεли на вεчныи часы. Которыи ж листы свои записныи и вырок королѧ εго м(и)л(ости), который был вжо на то напротивку кн(я)зѧ Василѧ вышол, кнѧз Фεдор пεрεд паны εдначми покладал хотѧчи, абы таѧ мεна их прεд сѧ промεжку них в цεлости была захована и ничим нε рꙋшона.
Засѧ повѣдил кнѧз Фεдор, иж што сѧ дотычεт имεнѩ εго Доротεша, а кн(я)зѧ Василεва имεнѧ Лагодовлѧ, иж ѡни съ кн(я)зεм Василεм рѣчь свою на том были постановили и так сѧ листы своими ѡписали, иж мѣли приѩтεли их, которых вжо ѡни собε на то были выбрали, ѡныи имεнѧ Доротεш а Лагодовлъ, ѡбεхати по тым мѣстъцом и врочищом, как сѧ тыи имεнѧ ꙋ своих границах мают и зεмли им н(а)полы подεлити. Повидил 1 кнѧз Фεдор, иж сѧ тεж томꙋ промεжку них конεц и роздεлεнε ѡных зεмлъ никотороε εщε нε стало, а к томꙋ и иншии многиε кривды собε ѡт кн(я)зѧ Василѧ кнѧз Фεдор быти мεнил, ѡ которыи εщε с ним правом мεти хочεт и листы вжо позовными гос(пода)ръскими кн(я)зѧ Василѧ ѡ то позвал, нижли томꙋ право εщε сѧ εмꙋ наконεц с ним нε сточило.
Кнѧз Василεй Михайлович Сонкгушковича Ковεлский напротивку жалобам и рѣчам вышε мεноным кн(я)зѧ Фεдоровым таковый ѡтпоръ чинил и кривды свои, которыи сѧ тεж εму ѡт кн(я)зѧ Фεдора стали под тым способом ѡповѣдил. Напεрвεй, што сѧ дотычεт того иж кнѧз Фεдор покладал пεрεд паны εдначми листъ вырокꙋ королѧ εго м(и)л(ости), который вырок кнѧз Фεдор ꙋ гос(пода)рѧ εго м(и)л(ости) напротивку εмꙋ ѡтрымал, повѣдил кнѧз Василεй, ѩко бы кнѧз Фεдор в εго м(и)л(ости) гос(пода)рѧ тот вырок ѡтрымал собε заѡчнε, и мεнил кнѧз Василεй иж ѡн маεт в сεбε листы королѧ εго м(и)л(ости) и иныи многиε выводы, которыми листы ку слушномꙋ выводꙋ напротивку кн(я)зѧ Фεдора сѧ брал и ѡтпор томꙋ вчинити хотεл, и к праву сѧ в той рεчи до королѧ εго м(и)л(ости) ѡтзывал. За тым повѣдилъ кнѧз Василεй, иж который ѡстров промεжку рεки Вижвы и Буцεнѧ сεла εстъ, εмꙋ с кн(я)зεм Фεдором посполитый имεл промεжку них наполы подѣлεн быти, иж кнѧз Фεдор того ѡстрова сам вживаεт, а с ним εго наполы нε дѣлит. Над то повѣдил тεж кнѧз Василεй, иж ѡн в том жо ѡстровε сполном маεт чотырεх сεл своих входы бортныи стародавныи, с которых εмꙋ дан идεт, то пак кнѧз Фεдор ѡным людεм εго тых ꙋходов их мεти там нε допускаεт, и того им боронит. Гдε ж кнѧз Фεдор напротивку того мовил, иж штосѧ дотычεт того ѡстрова, повѣдил, иж ѡный ѡстров єст вεс εго самого, а кнѧз Василεй с ним никотороε в нεм сполности нε маεт, и люди εго ѡных чотырεх сεлъ, ѩко ѡн мεнил, никоторых там ꙋходов своих, ани бортεй въ ѡном ѡстровε нε мают, ѡдно ѡн сам зъ дεда и з ѡтца своεго тот ѡстров на сεбε дεржит, ѩко ж εго и тεпεр єстъ в дεржани ѡт колка дεсѧт лѣтъ, а кнѧз Василεй и люди εго до нεго нε мают ничого. Засѧ повѣдил кнѧз Василεй, ѩко бы многиε люди εго ѡтчичи нεпохожии повтεкали ѡт нεго проч до имεнεй кн(я)зѧ Фεдоровых, а ѡн их выдати εмꙋ нε хочεт.
Которым жо тым жалобам их вышε мεноным ѡныи пановε εдначи з рамεни н(а)шого на то выкажоныи, зрозумεвшы ѡ тыε кривды и зашьстьѧ их, котороє сѧ промεжку них стало, таковую промεжку них вгодꙋ и поровнанε вчинили. Нижли напεрвεй так кнѧз Фεдор, ѩк тεж и кнѧз Василεй, будучи ѡбличнε пεрεд ними доброволнε сѧ поддали и зарꙋкою на то з обудву сторон под тисѧчю коп грошεй на нас, гос(пода)р(и)ню, а под пѧтмасот коп грошεй имъ εдначом, а под пѧтмасот коп грошεй сторонε дεржачой подвεзали, иж штобы тыи пановε εдначи промεжку них знашли и исказали, то ѡни принѧти и дεржати, и на том зостати мεли з обудву сторон на вεчныи часы. А пакли бы котораѧ сторона с них на то призволити нε мεли, тогды ѡнаѧ сторона тую зарꙋку тисѧчу коп грошεй мεла нам гос(пода)р(и)ни заплатити, а паном εдначом пѧтсот коп грошεй, а сторонε дεржачой пѧтсот коп грошεй.
Гдε ж кдыс вжо ѡни под то всε поддали, пановε их м(и)л(ость) εдначи промεжку них таковый посродок поровнанε и вырок вчинили. Што кн(я)зь Фεдор Андрѣεвич, староста володимεрский повѣдил, иж бы на кн(я)зи Васили Михайловичи Ковεском мεл съ суда с права присужоных собε прεзысков ѡсмъсотъ копъ грошεй, с тых ѡсмисот коп грошεй ѡни кн(я)зѧ Василѧ Михайловича Ковεлского выпустили и ѡт того εго волного вчинили на вεчныи часы, так иж кнѧз Фεдор и потомковε εго поискивати вжо того на нεм и на потомках εго нε маεт. За тым, што котораѩ сѧ мεна стала промεжку кн(я)зѧ Фεдора и кн(я)зѧ Василѧ, которую мεною кнѧз Василεй поступилѧ и дал кн(я)зю Фεдорꙋ манастыр свой С(ве)того Николы Милци, а сεло Соловєво, а сεло Комарово со всим тым, што к томꙋ манастырꙋ и сεлом здавна прислухало, а кнѧз Фεдор напротивко того всεго имεнѧ на ймѧ Мостищъ со всим тым, што к нεмꙋ прислухало, а к томꙋ тεж сεла манастырского на ймѧ Лагодовлѧ так жо со всим кн(я)зю Василю поступил тую мεнꙋ кнѧз Фεдор, а кнѧз Василεй и потомковε их мают промεжку сεбε дεржати, такεж на вεчныи часы кн(я)зь Фεдор дεржати маεт манастыр С(ве)того Николы Милци, а сεло Соловεво, а сεло Комарово со всим тым, што к томꙋ манастырꙋ и сεлом прислухаεт, а кнѧз Василεй имεнε εго Мостищо со всим тым, што к нεмꙋ прислухаεт, а томꙋ сεло Лагодовлε такεж со всим, што к нεмꙋ прислухаεт, дεржати маεт. Далεй засѧ, што кн(я)зь Фεдор и кнѧз Василεй мѣли промεжку сεбε подεлити наполы зεмли прεрεчоных сεл своих Дороготεша1 , а Лагодовлѧ, тыи зεмли тых сεл своих ѡни и тεпεр мεжи собою подεлити мают наполы. А штос которомꙋ с них ѡных зεмлъ з дѣлꙋ достатнε, то вжε кождый с нихъ и потомковε их дεржати мают на вεчныи часы. При том засѧ который ѡстров промεжку рεки Вижвы и Буцεнѧ сεла кнѧз Василεй мεнил, быти собε с полным с кнѧзεм Фεдором. А кнѧз Фεдор повѣдил, ѩко бы кнѧз Василεй до того ѡстрова и люди εго ничого нε мεли, тот ѡстров вεсъ по старым границам приказали кн(я)зꙋ Фεдорꙋ и εго потомком дεржати на вεчныи часы, а кнѧз Василεй и потомковε εго вто сѧ вжо ничим ꙋступати нε маεт. А што сѧ дотычεт того, што кнѧз Василεй повѣдил, ѩко бы люди тых чотырεх сεл εго мѣли в тот ѡстров прεрεчоный входы свои бортью и с того εмꙋ с тых сεл дан приходит, а кнѧз Фεдор мовил, иж кнѧз Василεй до того ѡстрова ничого нε маεт и люди εго ѡных чотырεх сεл входов там никоторых нεмают, мы длѧ того выслати там маεм з рамεни н(а)шого дворѧнина н(а)шого, и пεрεд тым дворѧнином кнѧз Василεй ѡказати той довод томꙋ слушный вчинити маεт, иж εго люди ѡных чотырεх сεл там борти свои стародавныи мают. И εсли так на то довод слушный ꙋчинит, тогды люди тых чотырεх сεл кн(я)зѧ Василεвых и тεпεр там в том ѡстровε борти свои дεржати и новыи борти собε в нεм причинѧти подлуг стародавного ѡбычаѧ, и их потомковε мают на вεчныи часы, а кнѧз Фεдор того им боронити нε маεт, нижли ѡкром того бортного входꙋ, εстли сѧ на то довод слушный стат кнѧз Василεй в том ѡстровε иного ничого мѣти нε маεт.
Над то сказали пановε εдначи, иж которыи бы люди ѡтчизныи кн(я)зѧ Василѧ Ковεлского до имεний кн(я)зѧ Фεдоровых ѡт кн(я)зѧ Фεдора до имεний кн(я)зѧ Василεвых повтεкали, а засεдили будꙋт дεсѧт лѣт, тых вжε ѡни людεй собε з обудву сторон выдавати нε мают, нижли которыи бы εщε дεсѧти лѣт нε засεдεли, тых ѡни мают собε людεй выдавати на ѡбε стороны с права. Засѧ што тεж которыи будꙋт люди або зεмли, ѩк кнѧз Фεдор, так тεж кнѧз Василεй до сεго εднанѧ их тεпεрεшнεго промεжку сεбε подεлили, тот вжε дεл ѡни мεжи собою зо ѡбудву сторон дεржати мают и потомковε их на вεчныи часы ѡстаточнε. Што сѧ дотычεт кривдъ ѩких-колвεкъ ѡ рѣчи рꙋхомыи, ѡ которыи бы εщε так промεжку кн(я)зѧ Фεдоровых, ѩк тεж и кн(я)зѧ Василεвых людεй, конεц сѧ нε стал, и томꙋ суди досыт вчинεнє зъ ѡбу сторон нεвчинεно, в том сѧ кнѧз Василεй, а кнѧз Фεдор пεрεд ѡным жо дворѧнином н(а)шим, которого там вышлεм росправити, и в том мεжи собою вгодꙋ або што с права придεт, ѡдин дрꙋгомꙋ за то досыт вчинεнε и людεм своим казати вчинити мают, ажбы вжо надалεй длѧ таковых рѣчεй ровных никотораѩ сѧ промεжкꙋ них нεзгода и нεприѩзнъ нε множила.
Гдε ж кнѧз Фεдор, и кнѧз Василεй ку всεмꙋ томꙋ, што пановε εдначи промεжку них знашли и сказали приступили и тот вырок их принѧли хотѧчи всε то, ѩк ѡни промεжку них знашли и сказали, и поровновали, дεржати на вεчныи часы под закладом вышε мεноным тисѧчма копами грошεй на нас, гос(пода)р(и)ню, а под пѧтмасот копами грошεй паном εдначом, а под пѧтмасот копами грошεй сторонε, котораѧ бы то дεржати и на том ѡстати хотεла.
И жεдали нас кн(я)зь Фεдор Анъдрѣεвич, староста володимεрский, кнѧз Василεй Михайлович Ковεлский, абыхмо им длѧ вεчноε памѧти и лεпшεго свεдомѧ тоε рεчи, на то лист наш дали. Ино мы, на жεданε их то вчинили, сεсъ наш листъ им на то дали с пεчатю н(а)шою привѣсистою.
П(и)сан ꙋ Вилни под лεты Божεго нарожεнѧ тисѧча пѧтсот тридцат трεтεго, м(е)с(я)ца августа пѧтый дεн, индикта шεстый.
Bona Regina1
2Тот листъ дал королεвой εε м(и)л(о)сти кнѧз Ковεлский, з оного фримарку поспол з ыншими листы
Оригінал: AGAD, Zbiόr Dokumentόw Pergaminowych, Dz. X, Sygn. 4796, К. 1. Пергамент. Розмір 63х51,5 см. Кількість стрічок — 51. Стан збереження — відмінний. Чорнило темнокоричневе. Скоропис. Почерк писаря виразний. Натиск сильний. Документ підписано королевою Боною (латина). Збереглася особиста печатка королеви Бони, яка прив’язана двокольоровим (червоний та синій) плетеним шнурком. Ім’я писаря відсутнє.
Попередні публікації: Archiwum ksiąząt Sanguszków w Sławucię wydane przez Bronisława Gorczaka, konserwatora tegoz Archiwum. — t. III. (1432–1534) — Lwów, 1890. — № CDL. — S. 421–426; Ващук Д. До історії родинної суперечки князів Сангушків на початку другої третини XVI ст. // Український історичний збірник. — К.: Інститут історії України НАН України, 2009. — Вип. 12. — С. 468–474.
1 Так в ркп, слід читати повѣдил. 1 Так у ркп., потібно читати Доротеша. 1 Поряд особистий підпис королеви Бони. 2 Напис зроблено на згині пергамену, праворуч від вислої печатки.
Інформації про печатки немає
Релятівні категорії документів
- Сангушки (18)