[1496].11.12. Вырок межи кнегинею Федоровою Соколинскою и сыном ее а межи паном Богданом Сопежичом о имене Черею а Тухачово

[1496].11.12. Вырок межи кне­ги­нею Федо­ро­вою Соко­лин­скою и сыном ее а межи паном Бог­да­ном Сопе­жи­чом о имене Черею а Тухачово
Алек­санъ­дръ, Божю м(и)л(о)стью.
Смот­ре­ли есмо того дела с Паны Радою нашою. Жало­ва­ли намъ кн(е)г(и)ни Федо­ро­вая Федо­ро­ви­ча Соко­лин­ская и съ сыном сво­им кн(я)земъ Федо­ром Федо­ро­ви­чам Соко­лин­ским на намест­ни­ка мцен­ско­го и любут­ско­го пана Бог­да­на Сопе­жи­ча, реко­мо бы онъ их выгнал з ыме­неи их отч­инъ­ных на имя с Череи а с Туха­чо­ва моц­но, без каж­до­го права.
И Бог­дан перед нами рекъ, штож теща его кн(е)г(и)ни Маря и съ сыномъ сво­им кн(я)зем Федо­ромъ пода­ва­ли и запи­са­ли ему тые две име­ни свои веч­но в чоты­рох­соть копах гро­шем, две­сте копъ запи­са­ла ему по доч­це сво­ем а по его жоне, а дру­гую две­сте копъ взя­ла в него на свои потре­бы, и тую две­сте копъ гро­шем запи­са­ли ему вызна­ва­ю­чи на тых сво­их име­ньях, ино того все­го чоты­ри­ста копъ гро­шем. И кн(е)г(и)ни Маря и сынъ ее кн(я)зь Федор к тому ся не зна­ли. И Бог­дан вка­зал перед нами тот запись их на тые име­нья, и они тому запи­су при­га­ни­ли, рек­ли, ижбы тот запись был фал­шо­выи. И Бог­дан поста­вил перед нами на то свет­ки и писа­ра того листа, хто его писал. И мы тыхъ свет­ковъ опы­ты­ва­ли, и свет­ки посвет­чи­ли, штож тая кн(е)г(и)ни перед ними тот запись ему на то дала и име­на их в тот листъ упи­са­ла, а писар тот теж к руце сво­ем при­знал. И кн(е)г(и)ни Маря и съ сыном сво­им кн(я)зем Федо­ром тым свет­комъ на том веле­ла при­сяг­ну­ти, ест­ли бы то они справне свет­чи­ли. И тые свет­ки на том присягнули.
И мы, под­лугъ тых свет­ковъ све­дот­ства, Бог­да­на Сопе­гу в том опра­ви­ли и тые име­нья при­су­ди­ли есмо ему под­лугъ их запи­су и то ему потвер­жа­емъ симъ нашим листомъ веч­но, и его жоне, их детем.
П(и)сан в Бере­стьи, нояб(ря) 12 день, индиктъ 15. Пр(и) [том] был(и): воев(ода) вил(еньский), кан(цлер), пан Мик(олай) Радм(вил); ст(ароста) жом(оитский) п(а)н Ст(анислав) Ян(ович) [Кес­га­и­ла]; мар(шалок) двор(ный), нам(естник) мер(ецкий), п(а)н Гр(игорий) Ст(аниславович) Ост(икович); м(а)р(шалок), н(а)м(естник) вит(ебский), пан Ст(анислав) Гл(ебович); м(а)р(шалок), нам(естник) вол(ковыиский), п(а)н Воит(ех) Кучук(ович.
Януш­ко, писар.1| [176(88v)]