Милостью Божъею, мы великій князь Швитрыгайло, Литовскій, Рускій и иныхъ. Чинимъ знаменито и даемъ вѣдати кождому нынѣшнимъ и потомъ будучымъ, кто пань возрыть или его чтучи услышитъ, кому жъ того будеть потребно: ижъ видѣвъ и знаменавъ (?) намъ службу вѣрную ани неопущоную некгды нашого вѣрного слуги пана Коленика Мишковича, и мы, порадившысе зъ нашими князьми и паны и зъ нашою вѣрною радою, даемъ и дали есмо тому преречоному пану Каленику въ Жытомирскомъ повѣтѣ село Бурковцы, а село Бодище во въ Згвягли, а Михеевичи, а Ходорковичи, а Теиконничи, а въ Овруцкомъ повѣтѣ село Остафьево на Кнорынѣ , какъ Остафей держалъ, а Вальковичи, а Демидковачи, а Дьмитреевича дѣти на Хвостницы, а подъ Полонимъ Вищы, и Кусопычи, а Плище на устьи Саменицы на Случи; и мы ему дали и записали за его вѣрную службу тая села зверху выписаная со всимъ съ тымъ, што къ нимъ изъ вѣка и здавна слушало и тягло, и таке слушаетъ вѣчысто а непорушно со всими входы и прыходы , ничого на себе не вымѣнивая , съ прыселки и селищы, и зъ нивами, и съ пашнями, и зъ лѣсы, и съ дубровами, и съ бортными землями, и зъ гаи, и съ пасеками, и зъ ловы и мзищы, и зъ бобровыми гоны, и зъ зеремямы, и съ крыницами, и зъ озеры, и съ потоки, и ставы, ставищи, и со млыны, и зъ мыты, и зъ болоты, и зъ рудами, и таке што у тыхъ имѣньяхъ собѣ примыслить и на новомъ корени посадить, и со всими платы, што к тымъ имѣньямъ слушаетъ и слушало, и таке и зъ луги и зъ сѣножатьми и со всими пожытки, можеть собѣ полепшывати и розширывати и осадити и прымножыти. А даемъ тому преречоному пану Калныику вѣчно и непорушно ему, а по немъ и дѣтемъ его и внучатомъ и его ближнимъ щадкомъ его, волны во всихъ тыхъ имѣньях кому отдати и продати и промѣнити пан Каленикъ и его ближніе и по немъ будучые.
А пры томъ были свѣдоки наша рада: архимандрытъ Печерскій Аврамей, а князь Иванъ Путята, а воевода Кіевскій панъ Юрша, а князь Борысъ Глинскій, а панъ Лостовскій староста Каменицкій, а панъ Петръ Войницкій, панъ Войдило, а панъ Гринко Сурвиловичь, а панъ Еско Мишковичь, а панъ Ромейко, а панъ Михайло Мошенскій. А на потверженье того нашего жалованья, про лепшую паметь и твердость, и печать нашу велѣли есьмо привѣсити къ сему нашому листу. Писанъ у Кіевѣ, подъ лѣты Рожества Іисусъ Христова тисеча лѣтъ и чотырста тридцать и семого лѣта, мѣсяца октебра семогонадцать дня, индикта первого.
