1600 февраля 18. – Квіт енерала Аршанскага пав. Анікея Сямёнавіча пра падзеі, што адбываліся ў камяніцы пана віленскага Хадкевіча пад час чакання падчашага ВКЛ Януша Радзівіла ў прызначаны дзень шлюбу з кн. Слуцкай

Року 1600, м(еся)ца фев­ра­ля 18 дня
На гра­де его коро­лев­ское м(ило)сти грод­ском в зам­ку г(о)с(по)д(а)рском Менскам пере­дом­ною Яном Куро­шом пад­ста­ро­стим мен­скимъ поста­но­вив­шы се оче­ви­сто ене­рал г(о)с(по)д(а)рский пове­ту Оршан­ско­го Они­кей Семе­но­вич пры кви­те сво­ем оче­ви­сто сознал и того созна­ня сво­е­го квит свой под печа­тю сво­ею и с под­пи­сом руки сво­ее, такъ тежъ и под печатьми сто­рон­ны­ми и с под­пи­са­ми рукъ, кото­рые з них писат уме­ли ку запи­са­ню до книг кгрод­ских мен­ских подал. Писа­ны в тые сло­вы: Я, Они­кей Семе­но­вич, ене­рал его коро­лев­ское м(и)л(ос)ти пове­ту Оршан­ско­го, я, Якубъ Бучын­ский, ене­рал его коро­лев­ское м(и)л(ос)ти двор­ный, а, Ян Кожу­хов­ский, ене­рал его коро­лев­ское м(и)л(ос)ти вое­вод­ства и пове­ту Бере­стей­ско­го, Лукашъ Коло­тов, ене­рал его коро­лев­ское м(и)л(ос)ти
зем­ли Жомойт­ское, созна­ва­ем сим нашым кви­том, иж за взя­тем нас на спра­ву и потре­бу ясне вел­мож­но­го пана его м(и)л(ос)ти пана Геро­ни­ма Ход­ке­ви­ча, пана вилен­ско­го, ста­ро­сты бере­стей­ско­го в сем кви­те мено­ва­ную, а маю­чы на ...собе сто­ро­ною шлях­ту пана Яна ..., пана Мика­лая Пашов­ско­го, пана ..., пана Ста­ни­сла­ва Сак­виц­ко­го, па... тов­ско­го, пана Дани­е­ля Ива­но..., Мико­лая Даров­ско­го, а п(а)на Миха­ла было есмо пры его м(и)л(ос)ти в месте сто­леч­ном Вилен­ском, в каме­ни­цы в... м(и)л(ос)ти Яна Каро­ля ста­ро­сты ...Ход­ке­ви­човъ гра­бе .. на Сави­чой ули­цы леж... в року тепе­реш­нем тисе­ча шест­сот­ном, м(есе)ца фев­ра­ля шосто­го дня. В кото­рой каме­ни­цы року, м(есе)ца и дня вышей поме­не­но­го впе­ре­д­ре­чо­ный его м(и)л(ос)ть пан вилен­ский, маю­чы на тот час пры собе неко­то­рых пановъ пры­я­тел сво­их, людей зац­ных и нас, воз­ных, з сто­ро­ною шлях­тою, дня вышей мено­ва­но­го м(есе)ца фев­ра­ля шесто­го дня у неде­лю за тыден передъ Запу­ста­ми рым­ски­ми в року тепе­реш­нем тисе­ча шест­сот­ном пры­па­да­ю­чы­ми, опо­ве­дал и освет­чалъ то нам, воз­ным и перед сто­ро­ною шлях­тою вышей мено­ва­ною, што жь дей его м(и)л(ос)ть вод­луг опи­су сво­е­го дано­го ясне осве­цо­но­му кне­жа­ти его м(и)л(ос)ти Кры­шта­фу Ради­ви­лу вое­во­де вилен­ско­му на ста­вене дня сегод­неш­не­го тут у Вил­ни в каме­ни­цы их м(и)л(ос)ти панов Ход­ке­ви­чов ясне осве­цо­ное кнеж­ны ее м(и)л(ос)ти Зофеи Юрев­ны Олел­ке­ви­ча Слуц­кое до пры­ня­тя шлю­бу мал­жен­ско­го доб­ро­вол­но­го, а не пры­му­шо­но­го з ясне осве­цо­ным кня­жа­тем его м(и)л(ос)ьтю паном Яну­шам Ради­ви­ло­ви, вое­во­ди­чом вилен­ским, ста­ро­стою боры­сов­ским, з сыном перед речо­но­го его м(и)л(ос)ти пана вое­во­ды вилен­ско­го тут се дей и з кнеж­ною ее м(и)л(ос)ьтю Слуц­кою ста­но­вит. Яко ж року, м(есе)цаи дня вышей поме­не­но­го фев­ра­ля шосто­го дня в неде­лю и за тыден перед Запу­ста­ми рым­ски­ми, его м(и)л(ос)ть пан вилен­ский, маю­чы нас воз­ных и сто­ро­ну шлях­ту вышей поме­не­ных до камен... поме­не­ное их м(и)л(ос)ти пановъ кгра­бов... В месте Вилен­ском на Сави­чой ули­цы каме­ни­цы кнеж­ну её м(и)л(ос)ть Слуц­кую ... пора­ну ...и через увес п... с поран­ку ажъ годи­на в ноч его м(и)л(ос)ть Яну­ша Ради­ви­ла ждалъ и кнеж­ну Юрев­ну Олел­ко­ви­ча ... ста­вил. А княж­на её м(и)л(ос)ть перед их м(и)л(ос)тями паны пры­я­те­лы сво­и­ми и перед нами воз­ны­ми и шлях­тою пры нас буду­чою мови­ла: “Иж дей его м(и)л(ос)ть пан вилен­ский если чынил поста­но­вене з его м(и)л(ос)тю паном вое­во­дою вилен­ским в недо­рос­лых летех моих, не будучы ведом воли моее, а снат и тое близ­кое кров­но­сти, кото­рая межы мною и его м(и)л(ос)тью паном Яну­шом Ради­ви­лом ест, так тежъ и того, ижъ его м(и)л(ос)ть пан Янушъ Ради­вил не ест набо­жен­ства косте­ла кате­лиц­ко­го, кото­ро­гом я ест, о чом всем я тепер, маю­чы лета зупол­ные, а взяв­шы пев­ную ведо­мост и посте­ре­га­ю­чы того, абым таким непо­рад­ким и с тем моим за его м(и)л(ос)ть пана Яну­ша Ради­ви­ла впе­ред Пана Бога не обра­жа­ла, а потом абых теж учсти­вост и мает­но­стей моих до жад­ных небес­печ­но­стей не пры­во­ди­ла. На тое поста­нов­лене через... м(и)л(ос)ть пана вилень­ско­го з его м(и)л(ос)тью паном вое­во­дою вилен­ским учы­не­ное, не поз­во­ляю и в мал­жен­ство з его м(и)л(ос)тью паном Яну­шом Ради­ви­лом всту­по­ва­ти не хочу и про­шу, абы ми се в том от его м(и)л(ос)ти пана вилен­ско­го жад­ное без­пра­ве не дела­ло”. Однак же его м(и)л(ос)ть пан вилен­ский маю­чы взгляд на лист опис свой, через тот увес ден яко то се вышей поме­ни­ло на его м(и)л(ос)ть пана Яну­ша Ради­ви­ла вое­во­ди­ча вилен­ско­го ждал, ниж ли его м(и)л(ое)ть пан вое­во­дич вилен­ский ку той спра­ве через тот увес ден ажъ и пры­бы­ти не хотел и не пры­был, а его м(и)л(ос)ть пил­ност свою а непры­бы­те и неста­но... м(и)л(ос)ти пана под­ча­шо­го нами, воз­ны­ми и сто­рон... пры нас буду­чою освет­чыл, а его м(и)л(ос)ть пан ста­ро­ста жомойт­ский теж, яко гос­по­дар дому сво­е­го, в кото­ром се тая спра­ва отпра­во­ват мела через увес тот день непол­ный шосты, м(есе)ца фев­ра­ля яко его м(и)л(ос)ти пана пад­ча­шо­го с пры­стой­но­сти пры­я­тел­ское ожы­дал, так тежъ пры­я­те­лом и слу­гам его м(и)ч(ос)ти вол­но­го пры­ежд­че­ня и отежд­че­ня не забо­ро­нял и овшем всих прых­о­дячых с хутью пры­я­тел­скою прый­му­ю­чы и отпу­ща­ю­чы нами, воз­ны­ми ене­рал­ны­ми, абы потом хто тако­вое вини на него его м(и)л(ос)ть в чем не вкла­дал, освет­чал и ока­зы­вал, чого все­го мы, вышей поме­не­ные ене­ра­ло­ве, будучы ведо­ми и сами на то через увес тот ден смот­речы, дали есмо их м(и)л(ос)тям сей наш квит ку запи­са­ню до книг под печат­ми и с под­пи­са­ми рук нашых. Так тежъ под печатьми и с под­пи­са­ми рукъ, кото­рые писат уме­ли, сто­ро­ны шлях­ты пры нас на тот час будучое.
Писан въ Вилне, року, м(есе)ца и дня вышъ поме­не­но­го. У того кви­ту печа­тей пры­тис­не­ных два­надцать, а под­пис рукъ писмом пап­ским и рус­ким под­пи­са­ны сут тыми сло­вы: Они­кей Семе­но­вич, ене­рал пове­ту Оршан­ско­го, влас­ною рукою, Jakub Buczinski enerzal ... krolewskiey m(ilo)sci reką swą, Ян Кожу­хов­ский, ене­рал рукою влас­ною, Лукаш Коло­тов, ене­рал зем­ли Жомой­ское, рукою под­пи­сал, Jan Kotlinski reką swą, Мikolау Pаszowskі reką, Andrzey Karczowski reką, Ста­ни­слав Сак­виц­кий рукою, Dаniеlу Wanowicz reką, Jan Gnatowski reką swą. Кото­рое оче­ви­чтое сознане ене­ра­ло­во и тот квит ест до книг грод­ских менских...