1572, квітня 23. Клевань. – Перший тестамент Ганни з князів Заславських, дружини князя Івана Федоровича Чорторийського

Ори­гі­нал: невідомий 

Копія: ЦДІАК Украї­ни. – Ф. 25, оп. 1, спр. 13, арк. 238 зв.-242. На про­хан­ня теста­тор­ки запо­віт 25 квіт­ня 1572 р. пред’явив у Луць­ко­му ґродсь­ко­му суді в при­сут­но­сті воз­но­го Луць­ко­го повіту Льва Вер­ховсь­ко­го пан Олі­зар Кирдей-Мильський.

Пуб­ліка­ція: Дем­чен­ко Л., Тес­лен­ко І. Теста­мен­ти князів Заславсь­ких // Острозь­ка дав­ни­на, вип. 7, 2020. С. 201–206.

Во имѧ Ѡтца, Сына и Духа Свεто­го. Нεхаи сѧ так станεть вод­лε воли а рεжεнъя Его Свεтого.
Я, Ива­но­вая Ган­на Чор­то­рыс­кая з Жεслав­ля, вεда­ю­чи то, иж жад­ная иншая рεчъ нε εст пεв­нεи­шая на свεтε над смεрть, котороε74 часом сво­им нεвε­до­мε на каж­до­го чоло­вεка при­хо­дить, гдε я, чую­чи з воли и допу­щεнъя Б[о]жог[о] быт тѧ[ж]кость хоробы75 своεε знѧтою, длѧ чого, умыс­ливъши по доб­рои воли, кромъ при­му­шεнъя жад­но­го и за зупол­но­го розу­му а доб­роε памεти своεε, ωстат­нεю волεю тεста­мεнтъ чиню, гдε­бы, наконεц, Пан Бог часъ смεрт­ныи на мεнε допу­стит рачил, абы у вεдо­мε была кажъ­дая рεч, на сεм тεста­мεн­тε моεм выωбра­жε­на, то, што бы по живо­тε моεм в рεчахъ рухо­мых дεтεм моим зостат мεло.
А такъ я напεрвεи пору­чаю душу мою грεш­ную П[а]ну Богу, в Тро­и­цы Еди­но­му, Сотво­ри­тε­лю своє­му, а тεло грεш­ноε ку похо­ванъю в цεрк­ви клε­ван­скои Тро­и­цы Свεтоε и вод­лε зако­ну хрε­сти­янъ­ско­го, ижбы свε­щεн­ни­ки тутош­ниε про­водъ и до соро­ка днѧ памεт чини­ли, а то им запла­чо­но маεт быти, убо­гихъ надεлѧли76, кормили.
А иж сын мои стар­шии кн[я]зь Иван εщε до лεт сво­их нε дошол, а так я, нε ωтсту­пу­ю­чи ωт тεста­мεн­ту кн[я]зѧ мал­жон­ка моε­го и в нεм ωсо­ба­ми зац­ных п[а]нов а при­ятεлεи ωпεкун­ми помεнε­ны­ми и до того злε­цо­ны­ми, так жε и я сама, ωбо­брав­ши εго м[и]л[о]сти п[а]на Бог­да­на Сопѣ­гу, воε­во­ди­ча ново­го­род­ско­го, || [арк. 239] ста­ро­сту гомεиского77, бра­та моε­го, и εго м[и]- л[о]сти п[а]на Ѡли­за­ра Кир­дεя Мыл­ско­го, мар­шал­ка зεм­ли Пин­скоε, их м[и]л[о]сти яко дεт­ки свои, так и всε имεнε, влост­ность, ωтчиз­ну их, так­жε и матεри­стоε своε Глу­ско, а Рычо­во, и част имε­ня Стε­пан­ско­го, што мнε пра­вом при­ро­жо­ным ωт п[а]нов вчас­ни­ков в Стε­па­ни выдεлε­но быти маεт, ку ωпε­цε их м[и]л[о]сти подаю и злε­цаю. Кото­рым покор­нε чолом бъю: длѧ М[и]л[о]стивого Б[о]га, рач­тε лас­кавε их самыхъ и вси имεнε ихъ в опεцε78 , ув обо­ронε и в лас­ка­вом дозрε­ню мεт до лεт сына моε­го стар­шо­го кн[я]зѧ Ивана.
И будучи мнε аж и до сεго часу в удов­ствε по кн[я]зю мал­жон­ку своεмъ зоста­лою, в спра­вах и шафо­ва­ню дεт­ка­ми и домом моимъ почтивε, и то, што мнε налε­жа­ло, яко вεр­нои мат­цε ихъ, в пил­номъ а повин­номъ ωбмыш­лѧ­ню ω них, за помочю, лас­кою а м[и]л[о]с[ε]рдьεм Его Свεтым, и при том всεмъ, при чом мѧ зоста­вил милыи мал­жо­нок мои з дεт­ка­ми н[а]шими спол­ны­ми, выданεм дочок сво­их двохъ Ѡлε­ны а Катεри­ны за их м[и]л[о]сть зац­ныхъ панов а при­ятεл сво­их и зѧтεи доста­точ­нε а справ­нε з дому ωтца их вεномъ, и поса­гом, и над тεста­мεнт кн[я]зѧ мал­жон­ка моε­го, по тисε­чи коп гро­шεи ωсоб­ливε им при­чи­нив­ши, то εст двε тисѧ­чи коп, и иным ωбъ­дарεнъ­εмъ з матεри­сто­го своε­го досыт εсми им вчи­ни­ла, ω што бол­шεи ωни сами из мал­жон­ки сво­и­ми на бра­ти своεи кн[я]зю Ива­ну а кн[я]зю Юрю допи­рат ω вεно своε нε мают, лεч Воис­εч а Холо­пы, выку­пив­ши и ωтло­жив­ши п[а]ну Васи­лю Заго­ров­ско­му, зѧтю своε­му, тисε­чу коп гро­шεи вεна по сεстрε своεи кн[я]жнε Катεринε, тыε помεнε­ныε имε­ня двѣ Воис­ѣ­чи а Холо­пы к рукам сво­им взя­то, с тым зо всим, яко на рεи­страх, щимъ79 пода­но εсть, ωписано.
Кото­рая доч­ка моя малая трεтѧя Алεк­сандра, в дому зоста­лая, εст­ли εε Пан Бог за бла­го­сло­вεн­ством Сво­им Свѧтым судит замуж пои­ти, тогды сыно­вε мои, а братѧ εε, вод­лε повинъ­но­сти своεε з дому влос­ноε ωтчиз­ны по тому ж εε выпра­ви­ти мают, яко и я тых пεр­шихъ выпра­ви­ла дочокъ сво­ихъ, а сεстръ их, и вод­лε налεп­шо­го || [арк. 239 зв.] бачε­ня и м[и]л[о]сти своεε. И εсли жε тым двом доч­камъ моим над тεста­мεнт кн[я]зѧ мал­жон­ка моε­го, выда­ю­чи в стан мал­жεн­скии болшъ, яко по тисε­чи коп гро­шεи з отчиз­ны их при­чи­ни­ла, тогды я напро­тив того имεнε моε матεри­стоε Глу­ско а Рычо­во, за ωбда­ро­ванεмъ мату­х­ны моεε εε м[и]л[о]сти кн[я]г[и]ни Наста­си Куз­ми­ноε Жεслав­скоε, што на мεнε близ­ко­стю при­шло, поло­ви­ну Глюска80 на част мою, а в Рычо­вε мεжи ины­ми вчаст­ни­ки част, так жε часть и в Стε­па­ни, тым имεнεмъ, на част мою при­слу­ха­ю­чую, дарую и то вεч­нε зоста­вую сыном моим двумъ кн[я]зю Ива­ну а кн[я]зю Юрю, ωдно тои мεн­шои доч­цε моεи Алεк­санъ­дрε запи­сую на том матεри­стомъ имεнъю своεмъ на Глускю81 и на Рычо­вε пѧт­сот копъ гро­шεи лич­бы литов­скоε, яко сѧ вышεи помε­ни­ло. Гдε­бы εи Пан Бог судит рачил замуж пои­ти, тогды сыно­вε мои, а бра­тя εε, мают εи тыε пѧт­сот копъ гро­шεи литов­ских, ωт мεнε ωсоб­ливε з лас­ки даро­ва­ную, и зятю своε­му, за кого б пошла, спол­на дат и запла­тит кро­мѧ выпра­вы з отчиз­ны дому своεго.
А εст­ли б тыε доч­ки мои, замуж выданы[ε], и тая трεтѧя, гдε бы замуж пошла, хотε­ли бъ вына­идεнεмъ прав­ным з мал­жон­ки сво­и­ми ров­ноε части дохо­дить з братεю своεю, тогды пεр­во мают ωтло­жи­ти бра­ти своεи кн[я]- зю Ива­ну а кн[я]зю Юрю по двε тисε­чи копъ гро­шεи лич­бы литов­скоε, то εст шεст тисεчεи коп гро­шεи, тεж ров­ныи дεл мεти з братεю своεю в [Г]луску82, в Рычεвε – части имε­ня моε­го матεри­сто­го. А нε ωтло­жив­ши бра­ти своεи шεсти тисεчεи копъ гро­шεи литов­ских, нε мают ния­ко­го мовεнъя ω то з ними чинит и часть сво­их прε­на­и­до­ват. Ѡдно тои мεн­шои доч­цε моεи Алεк­сан­дрε зо всихъ частεи мают пεр­во пѧт­сот копъ гро­шεи сыно­вε мои εи, сεстрε своεи, и зѧтю своε­му ωтдат. А εст­ли бы то εи пѧти­сот копъ гро­шεи, пошεд­ши εи замуж, сыно­вε мои εε зара­зом давать нε хотε­ли, тогды и бεз ωткла­до­ва­ня двох тисεчεи коп гро­шεи мают εи и мал­жон­ку εε в том матεри­стомъ имε­ню в Глу­с­ку а Рычεвε ров­ную част всε­го з люд­ми, з кгрун­ты || [арк. 240] и ины­ми пожит­ки имъ выдε­лит и посту­пит. И дεр­жать, и вжи­вать в части з мал­жонъ­комъ сво­имъ маεть аж до отда­нья спол­на ωноε пεти­сот копъ гро­шεи литов­скихъ ωт нихъ. А к тому εи назъна­чо­ную ωт рεчεи нεвε­ли­кихъ рухо­мыхъ, што пεрε корот­кост живо­та моε­го бол­шε ся εи по выда­нью пεръ­шихъ дочокъ спра­вить и при­ба­вить нε мог­ло, мεно­ви­тε пεр­ла вси, што εсть, ланъ­цу­жокъ золо­тыи, в нεмъ сорокъ золо­тыхъ; два крижики83: ωдинъ з дыя­мεнъ­та­ми, з руби­на­ми и с пεр­ла­ми, дру­гии зъ кга­ма­ин­томъ, з руби­на­ми и ωко­ло пεр­ла­ми; цεглε84 с камεнъ­εмъ а и с пεр­ла­ми, поεсъ срεбрε­ныи с позло­тою, а дру­гии пεръ­ло­выи, два полу­мис­ки срεб­ныхъ с при­став­ка­ми двε­ма срεбрε­ны­ми, ложокъ тузинъ.
А што тεжъ кн[я]зь мал­жо­нокъ мои тεста­мεнъ­томъ назна­чил сыну своε­му стар­шо­му кн[я]зю Ива­ну ланъ­цух вεли­кии пан­цεро­ва­тыи, в нεмъ три­ста два­дцать золо­тых, коштов два­надцать срεбрε­ныхъ, ряды два срεбрε­ныхъ позло­ти­стихъ козац­ких на чор­ном ωкса­ми­тε, дру­гиε два ряды гусар­скихъ вεли­ких сърεбрε­ныхъ позло­ти­стыхъ и рош­копъ, шабεль турεц­ких двε, срεбромъ ωправε­ныхъ позъ­ло­ти­сто, шаб­ля, срεбромъ ωправε­ная, шаб­ля турεц­кая по чεр­кас­кии, срεбромъ ωправ­лε­на позъ­ло­ти­сто, ωстро­ги вεли­киε гусар­скиε срεбрε­ныε, сεд­ло турε­цъ­коε, с кото­рых ланъ­цух а два­надцать коштовъ – то εсть в заставε в Луц­ку у Юска жида в двохъ­сотъ копахъ гро­шεи литов­скихъ, бомъ то заста­ви­ла для пилъ­ноε потрε­бы моεε и дεтεи моих. Рады помεнε­ныε, двε шаб­ли: ωдна с позъ­ло­тою, || [арк. 240 зв.] дру­гая срεбромъ – то εст у склѣ­пε в зам­ку захо­ва­но, а трεтюю шаб­лю, ωстро­ги и сεд­ло турε­цъ­коε и ωт85 инъ­шихъ нεма­ло рεчεи εщε самъ нεбож­чикъ кн[я]зь малъ­жо­нокъ за живо­та своε­го порозъ­да­валъ, бо былъ живои послε того тεста­мεнъ­ту справ­лε­но­го мало нε чоты­ри роки, вεд­жε ωстро­ги и иншиε мεнъ­шиε гусар­скиε εсть при рεчахъ.
А иж мал­жо­нокъ мои при спра­во­ва­нью тεста­мεнъ­ту своε­го, нε вεда­ю­чи ω с[ы]ну своεмъ мεнъ­шомъ Юрахъ­ну дру­гомъ, бомъ при надεи, [зъ] лас­ки Божεи, на ωн часъ в живо­ти εсми εго носи­ла, [съ] тых при­ч­инъ εму ωтεцъ на таста­мεнъ­тε с тыхъ рεчεи рухо­мых нε запи­салъ, ωдно стар­шо­му сыну, алε помε­нив­ши в тεста­мεнъ­тε, εсли бы дεв­ка была – посаг назна­чо­ныи мεть, а εст­ли сын – ров­ныи дεл з бра­томъ. А такъ я, яко повин­ная мат­ка, чинѧ­чи з сεбε и ров­нε милу­ю­чи ωбε­юх сыновъ сво­их, а на то ωглε­да­ю­чисѧ, абы тот мεн­шии сын нашъ на мεнε, мат­ку свою, нε нарε­кал, жε ωдно­му ωтεц всε стар­шо­му сыну запи­сал, а εму ничо­го, я тεж про­тов 86 того, кото­роε срεб­ро в робо­тε по кн[я]зю мал­жон­ку моεмъ при­чи­ни­ла, то εст налив­ку з руко­мысεю срεбр­ныε, чара вεли­кая срεбр­ная скла­ды­ва­на позло­ти­ста, два куб­ки срεбр­ныхъ высо­кихъ, лан­цуг, в нεмъ дεвεт двадцать87 золо­тыхъ чир­во­ныхъ, кото­рым тым всим срεб­ром и лан­цу­хом, и то сыну моε­му мεн­шо­му кн[я]зю Юрю тым тεста­мεн­томъ моимъ запи­сую, што εму ωдно­му ωт бра­та стар­шо­го дарую и зоста­вую. Чара помεнε­ная и два куб­ки – то там жε в Луц­ку у Юска жида поспол з лан­цу­хом и с ков­ша­ми εст в тои жε сумε п[ε]н[ε]зεи в заставε.
Листы при­ви­ля на имε­ня и потвεр­жεнε, такъ и всѧкиε кви­ты – тоε всε в скрын­цε листо­вои в склε­пε том жε || [арк. 241] εст в захованю.
Дол­ги, што винно:
Пεр­шии. Вла­ды­ка тεпεрεш­нии луц­кии Иωна Бор­зо­бо­га­тыи Красεн­скии з уго­ды при­ятεл­скоε за кгрунтъ Воис­ε­цъ­кии, при­да­ныи ωт кн[я]зѧ мал­жон­ка моε­го къ Забо­ро­лю, ωстал винεн шεст­сот копъ гро­шεи литов­ских на записε своεм, мнε даным. На фол­вар­ку Красεнъ­ском чоты­ри­ста коп гро­шεи литов­ских, што кн[я]г[и]ни Локац­кая ωтло­жи­ти маεт. На п[а]ну Гри­го­рю Чап­ли­чу двεстε жита мац ровεн­скоε мεры позы­чо­ных дав­но вод­луг при­рεчεнъя а запи­су своε­го, ω кол­ка лεт волочεт.
Я тεж п[а]ну Пεт­ру Заго­ров­ско­му вин­на пол­то­рас­та коп гро­шεи литов­скихъ, за што про­шу п[а]новъ ωпεку­новъ, тоε всε спра­вив­ши, и дол­ги, комумъ вин­на, зна­мε­ни­тε попла­тив­ши и тую заста­ву всю ωт жида высво­бо­див­ши, тыми або ины­ми бор­зо­пла­то­вы­ми з ымεнεи п[ε]н[ε]зьми ωстаткомъ88. Што ся εщε в склε­пε ωт срεб­ра, ковεр­цовъ и кос­ма­тых рεчεи зоста­ло, тоε всε ωт мала до вεли­ка доста­точ­нε на рεи­стръ εсть спи­са­но подъ пεча­тью моεю и п[а]на Ѡли­за­ра Кирдεя.
Своε, што кому запи­са­но, сыно­вε мои, по ωсоб­ну ωтнѧв­ши, а ωстат­ком вси­ми рεч­ми наров­но полεлити89 мают.
То тεжъ в[а]шε[и] м[и]л[о]сти ωзна­и­мую, а п[а]нов ωпεку­новъ и сына моε­го стар­шо­го жεдам и про­шу, ижъ за вεр­ныε служ­бы врѧд­ни­ка моε­го клεванског[о] Жда­на Брон­ниц­ко­го, кото­рыи час нεма­лыи слу­жил кн[я]зю мал­жон­ку моε­му и мнε по кн[я]зε, и до сεго часу, за сполъ­нымъ зволεнъ­εмъ сына моε­го кн[я]зя Ива­на, дала εсми εму ωсмот­рεнε Вол­ку з люд­ми за Гро­бо­вои власт­ны кгрунт имε­нья дεтεи моих волокъ ωсмъ. Нεхаи бы в томъ рушонъ нε был. А ωн, яко мнε слу­жил, такъ и дεтεмъ моимъ слу­жи­ти маεть. Такъ тεжъ и инъ­шихъ слуг, кн[я]зю малъ­жонъ­ку моε­му заслу­жо­ныхъ, кото­рых εсми по кол­ку волокъ з люд­ми ωсмот­рε­ла, абы на томъ были спо­ко­инε захо­ва­ни, бо и дани­ну нεко­то­рыε при томъ мεли зъ сук­номъ, нε можε ли быт бол­шою лас­кою пра­во­ва­но, а тоε бы з лас­кою мεли и дεржали.
Пани Проску­ри­ная, повинъ­ная моя, кото­рую εсми с Канε­ва з дому εε на сло­во своε при­ба­ви­ла, и дала εсми εи коли εсть90 в Дяд­ко­ви­чахъ, на чомъ Язуб­ли жилъ. || [арк. 241 зв.] За то про­шу, абы с того и с тымъ, с кимъ ωна мεш­каεть тамъ, будεть нεру­шо­на ани скры­въжо­на ни в чомъ была, и ωвшεмъ εи, яко ли ку повинъ­нои мо[ε]и, ωтказуючи.
Такъ тεжъ и слу­жεб­ни­цамъ моимъ, вдо­вамъ зоста­лымъ, кото­рыε мнε завж­ды з мужми сво­и­ми слу­жи­ли, и тεпεр εст­ли замужъ пои­дуть, буд­тε имъ в[аши] м[илости] лас­ка­ви и крив­ды нε казат чинить. И повторε для П[а]на Бога про­шу, абы тот тεста­мεнътъ мои статεч­нε здεр­жанъ былъ, яко бы жад­но­го нарε­ка­нья на кн[я]зя малъ­жонъ­ка моε­го и на мεнε нε чини­ли, хова­ю­чи­ся, и под бачεньε, и лас­кою своεю слу­гамъ при­εжъ­чимъ, з дани­ны слу­жε­чи, и кото­рыи бы по нεмъ ωтεжъ­чаεть хотεли91, тымъ ωтпра­вы про­шу даи­тε по пεти копъ гро­шεи и по жεрεбцу.
А такъ вас, дεтεи сво­их милых, и зо всимъ вло­сти­вымъ в[а]ш[εи] м[и]л[о]сти пору­чаю в опεку Пану Богу Сотво­ри­тε­лю, про­ся­чи Его Св[я]тоε М[и]л[о]сти, абы бла­го­сло­вεньε Его Бозскоε лас­кавε а милосεр­дε завж­ды прεбывала92 з вами в помεш­ка­нью до надалъ­шо­го живо­та хрε­сти­ян­ских справъ богобо[я]з нε, наслε­ду­ю­чи в рядости93 а потε­хахъ до того, поки будεть воля М[и]л[о]с тиво­го П[а]на Зба­ви­тεлѧ нашого.
А при том были и того доб­рε свε­до­ми их м[и]л[о]сть п[а]новε а при­ятε­ли мои панъ Ѡли­заръ Кир­дεи Мыл­скии, мар­ша­локъ зεм­ли Пин­скоε, пан Заха­ряшъ Лаго­дов­скии а пан Гεк­тор Кава­чин­скии, ста­ро­ста ωлыц­кии. И для лεпъ­шо­го утвεр­жε­ня про­си­лам ихъ м[и]л[о]сти тых жε зац­ныхъ п[а]нов ω при­ло­жεнъε пεча­ти. Их м[и]л[о]сть то на про­збу мою вчи­ни­ти и пεча­ти свои к сεму тεста­мεн­ту при­ло­жит рачи­ли, до кото­ро­го тεста­мεн­ту своε­го и я тεжъ пεчат свою приложила.
Писан въ Клε­ва­ни року Божо­го Наро­жεнъя тисε­ча пят­сотъ сεм­дε­сят вто­ро­го м[ε]с[ε]ца апрε­ля два­дцат трεтε­го дня.
Ѡли­зар Кир­дεи Мыль­скии, мар­ша­локъ εго кролεв­скоε м[и]л[о]сти повεту Пинъ­ско­го, руку властную.
Заха­ряшъ Лаго­дов­скии, руку властную.
Гεк­торъ Кава­чин­скии, || [арк. 242] рукою власною. 

При­міт­ки:
74 Так у тексті.
75 Дві остан­ні літе­ри правлено.
76 Сло­во правлено.
77 Сло­во правлено.
78 Сло­во прав­ле­но. 79 Так у тексті.
80 Так у тексті.
81 Так у тексті.
82 В ори­гі­налі: Луску.
83 Сло­вос­по­лу­чен­ня два кри­жи­ки правлено.
84 Сло­во правлено.
85 Так у тексті.
86 Так у тексті.
87 Так у тексті.
88 Так у тексті.
89 Так у тексті.
90 Сло­во правлено.
91 Так у тексті.
92 Так у тексті.
93 Так у тексті.