Року тисеча шестсот двадцатъ пятого м[е]с[а]ца июля чотырнадцатого дня.
На роках судовых земских кременецких, в шест недел по светой Троицы рымском
святе в року звыш менованом припалых и судовне отправовати зачатых, перед нами
Самоелемъ Ледоховским, судею, а Яномъ Гораином, подсудъкомъ, врядниками судовыми
земскими кременецкими, ставши очевисто, шляхетный Павел Дудковъский для вписаня
до книг нинешних земских кременецких пер облятам подал тестамент князя Якова
Василевича Крокотки, просечи, абы принят и до книг уписан был, а так мы, суд, тот тестамент, за поданъемъ и прозбою помененого пана Дудковского для вписаня до книг приймуючи, перед собою читати казали есмо, и так ся в собе мает.
Во имя Божее Светое и Живоначалное Тройцы станся. Я Яковъ Василевич Крокотка
Еловицкий ознаймую то и чиню явно всим посполитым, кому потреба будетъ вказовати
албо // чтучи его послухати, нинешнимъ и напотом будучимъ, штож з навеженя Божого
будучи мнѣ обложоного хоробою и розумеючи то, иж кождый чоловѣк ест смертелный,
который ся на тот свѣтъ не народил, тот не умрет, и взявши по собѣ сам, иж с тое хоробы живъ быти не могу, але хотечи сам по доброй воли своей, без жадного примушенья и намовы людское приятелское, при животе и по смерти живота своего малжонку и промежку детей своих порядност и вы именъях своих во всей отчизне поровнанъе и покой вечный вделяти, иж бы по животе моем спокойное и вечное мешъкане промежку собою мели, то вчинити и зоставити не на словех, што под часом с памети людское и сходит, толко на писме под сведомомъ врядовым и приятелским, будучи в доброй памети, целомъ и зуполномъ
розуме, врозумевши99 тестамент мой. На первей поручаю и даю в руки душу свою Богу
Сотворителю в Тройцы Единому, а тело мое грешное мает жона, дѣти мои почтиве, ведле
закону нашого хрестянъского, погрести и по души моей на церкви Божии роздати на
сорокоусты и памети чинити. И ку тому теж то на томъ тестаменте докладаю, иж маючи за собою у малженстве светомъ з дому зацнаго, почтивого, дочку небожчика // пана Олехна Гринковича Козинъского на имя Овдотю, по которой взял есми посагу, вношенъя в дом мой сто копъ грошей готовых личбы и монеты литовское а сто копъ в золоте, в серебре, в шатах, перлах клейнотах и иншихъ многих рухомых речах. Што я все до рукъ своих взял и ку своему пожитку обернулъ, а инъшие рѣчи, бываючи часто крот на службах господарских и земскихъ, утратил и на то есми еи малжонъце своей никоторой слушной оправе и твердости на именях моихъ отчизных не вчинил. А будучи в томъ малженстве светом з нею, малжонкою моею, мел и маючи ку собе аж до сего часу службы и склонности и сердечную милость, яко на малженъский светый станъ приналежитъ, паметаючи тые службы ее и цнотливое захованье, теперешнеи остатнои воли и часу своего смертелную показавши еи ласку свою, якъ напротивку того вѣна, вношеня ее в дом мой двохсот копъ грошей, и ку тому з ласки своей привенъку дру(гу)ю двесте коп грошей личбы литовское, такъ теж и за цнотливыи службы и склонности ее напротивко мене, малжонка своего, заховуючи в том ведле звыклости нашое хрестянское и ничимъ не отступуючи статуту права земского, хотечи еи малжонце и детем моим по животе своемъ покой вѣчный // вчинити, иж бы жона и дети мои на мене не плакали, але спокойное мешъкане мели, вѣдаючи вшелякие пожитки в ыменяхъ моих Еловичах у Ворсине, в Чекне и в Котелеви, выймуючи зо всих тых именей моих за третюю част двор мой Еловицкий зо всим будованем и именье Еловичи з бояры путъными, з людми тяглыми, з дворищи пустовскими, с полми и сеножатми музкими, такъ яко которое дворище за отца моего и за мене держано было, и ку тому ставъ и млынъ чеконский зо всими пожитки, и в гае дерево бортное со бчолами и в котором бчол нитъ, и бчолы вси в пасеце, пашъня в гумнахъ нажатая и на поли засѣяная, и подворем в замку господарскомъ луцкомъ, шаты, цѣнъ, мѣд, а грошей готовых и сребра того ничого не маю, кони ездные, стадо сверѣпъе, быдло рогатое, овцы, козы, свини, кури, гуси и вшелякие рухомые малые и великие, яким колвекъ именемъ названые домовые рѣчи и привеллея господарские нивя100 именъя, отчизну мою, то все даю дарую и на вечност тымъ тестаментомъ моимъ описую, оддаляючи то от всих детей, дочок и зятеи моих, их потомковъ, малжонце моей княгини Овдоти Олехновне на вечност, и ку тому пол и сеножатей дворных, которые я к тому двору Еловицкому за живота своего держалъ и вживал, так // теж в гаех и на будованъе дерева и на рубане дровъ, в рецѣ Стыру бобровых гонъ и на поли ловы зверины и пташъе, на всемъ на томъ записую малжонце своей третюю част также на вечност, а малжонка моя с тое третее части, от мене еи на том тестаменте выше на вечност
меновите описаное, дѣтемъ, дочкамъ моимъ, не мает и не будет повинъна никоторое
выправы и посагу давати, толко спокойное мешкане мети мает и то все держати и вживати на вечные часы и волна будет по животе и при животе своемъ дѣтем, дочкамъ своим, которой з них, албо тому, кому хуть и воля ее на то будетъ отдати, продати, даровати на церковъ Божую записати и такъ тымъ шафовати ведле воли и мысли своее, а дети, дочки мои вси и зятѣ мои не маютъ еи того забороняти и в тое ся вступовати, толко вечное молчане мети мают.
А внука моя Овдюхна, дочка небожчика зятя моего Василя Красовъского, то мает
малжонка моя княгиня Овдотя до себе взяти и ховати до лет ее, а коли лета свое мети будет, тогды мает еи и повинна будет с части своее дати пятнадцет копъ грошей готовых, две сверѣпы стадних, пят волов а три корове. А што се тычет тых пол и сеножатей, дерева бортного и гаевъ, што предки мое и я сам надали на церкви Бо//жии, на церковъ Чесного Хреста и на церковъ светого Дмитрия, в тои земли и в гаи цер[ков]нии жана, дѣти, дочки и зяти мои ничимся не мают вступовати и отцем (цер)кве Божи отыймовати. К тому теж, штося дотычет именя моего Ворсина, Чекня и двох ставовъ верхнихъ и млиновъ, пол, сеножатей, гаевъ, бобровых гонъ, ловов зверинних и пташих и дворища пустовского на Гънидаве, которое лежит недалеко от двора королевского, и вшеляких пожитковъ малых и великих, што с тым именям на тые две части приналежит, то все отписую дѣтем, дочкам моим Марухне, Настаси, Ганне, Масци и Полагъне, которые лета мают и которые лет не мают, если замуж пойдут, тогды то промежку собою на части ровные розделяти, водле права прирожоного, мают, которые еще замуж нешли, тые мают с частями своими, што на нихъ прийти мают, зо всим с тым каждая з нихъ при малжонце моей а матце своей кнегини Овдоти мешкати, а жона моя а матка их тых именей и всих пожитковъ ничим утратити не мает, але коли замуж пойдут, тогды то все им каждой з них в целости вернути мает. Ку тому теж которую сорок копъ грошей литовских, едучи на послугу господарскую до Ифлянт, // взял и позычил в зятя своего небожчика Василя Красовского и записал есми ему тую суму пенезей на именю моем отчизном Котелеви, то и тепер бым тестаментомъ моим, остатною волею своею, записую и той лист мой записний на тую сорок копъ грошей потвержаю, которое имене Котелев дочка моя Марухна Василевая Привередовская в той суме сороку копах грошей и до сего часу держитъ, тогды и дочки мои и сестры ее, коли замуж пойдут, а будет ли им в том кривда се видити, на первей они сами и зяти мои тую сорокъ копъ грошей власного долгу моего дочцѣ моей а сестрѣ своей Марухне всѣ ровными частми заплативши, тож тое имене Котелевъ на ровные части, ведъле права прирожоного, росделити и поровъняти на вечные и потомные часы мают, а не отдавши тыхъ сорока копъ грошей, ни в чом ся в тое именъе Котелевъ вступовати не мают иж до зуполъное заплаты. А въ опеку поручаю жону и дѣти мои приятелем своих их милости пану Михаилу Федоровичу Сербину Хорохорынскому, земли Волынское суди и повету Луцкого, а пану Анъдрею Ивановичу Русину, подстаростему луцкому, а шурину своему пану Дмитру Олехновичу Козынскому. Якож если тот
тестамент, остаточъную волю, на въряде в замку господарском Луцъком через // приятеля своего и черес лист свой оповедил и до книгъ врядовых зем. записати дал и на то дал есми малжонъце моей княгини Овдотъи Олехновне тот мой тестамент з моею печатъю.
А при том были и тому добре сведоми панъ Войтех Красовский, воротный луцкий, на тот часъ будучи на месцу пана Анъдрея Русина, подстаростего луцкого, в Луцку, а панъ Федор Русинъ, писаръ луцкий, а панъ Томило Ворона Боротинъский. Которые за прозбою моею печати свое приложили к сему моему тестаменту. Писан въ Еловичах лета Божего Нароженъя тисяча пятсотъ шестьдесятъ четвертого м[е]с[а]ця марца осмнадцатого дня.У того листу печатей притисненых чотыри черзъ таки.
При котором актикованъю того якобы тестаменту князя Якова Василевича Крокотки або Кропотки сведчился соленитер сам от себе и од всих пановъ Еловицких урожоный
его милость панъ Захарияшъ Боженецъ Еловицкий, столникъ киевъский, секретар и
писар его королевское милости, против тому титулови того то князя Крокотки або
Кропотки, з Мосъквы недавно не ведати яким способом выеханому и Еловицъким ся
написанному, и противъ печати гербови его, в котором под крыжом и хорогвою о двох
розвиненыхъ // конъцах, што здавна слынетъ Боженец, гербъ такий нашъ дедичовъ
Еловицъкихъ, тот князь Крокотъка межи тые два концы хоругъви гербу нашого свои
три зубы або колки втрутил и вырыл в такую форму и смелсе написати неслушне и
неналежне титулом старожитным нашим власным Еловицким, по дедицтве нашом селе
Еловичах, в повете Луцком над рекою Стыром з гаем и з двема приселками Ворсином,
Чекнем и Котилевом лежачих и в заставе у него будучих, и противъ тому тестаментови
и кондицыям его, яко неналежне и неправне пописаным, якобы в диспозыцыю свою
добра наши дедичные затигаючи. О што все правом хотечися росправити и просил, абы
тая протестацыя его милости при том же актикованъю того мниманого тестаменту
князя Кропотчиного до книг зем. крем. принята и записана. Которые такъ, такъ тот
тестамент, яко и протестацыю его милости пана столника киевъского, за принятем
нашим судовым до книг ест записаны.
Ящ. Кремен. № 1512, актъ «МФ».(Киевский центральный архив)