1541 октября 2. – Жалованная грамота короля Сигизмунда боярину Гавриле Олексеевичу на Голенчичи Каменецкого повета после зрадцы князя Петра Горчака

Жик­ги­монтъ Божею мило­стью король Поль­скій. Билъ намъ чоломъ бояринъ нашъ Гав­ри­ло Олексѣе­вичъ и повѣ­дилъ передъ нами, ижъ кото­рые имѣ­нья въ повѣтѣ Полоц­комъ отецъ его Алексѣй Лукья­но­вичъ Тере­бу­еж­скій, на про­тив­ку отчиз­ны сво­ей, кото­рую у Тороп­цу мѣлъ, зъ Дани­ны нашое дер­жалъ, то пакъ дей отецъ его въ небыт­но­сти его змеръ, а онъ ся отца сво­е­го малъ зосталъ и на служ­бѣ у пан­ствѣ нашомъ княз­ствѣ вели­комъ Литов­скомъ былъ. А въ тотъ часъ будучи ему у моло­до­сти лѣтъ его тые имѣ­нья его у повѣтѣ Полот­скомъ къ зам­ку наше­му Полот­ско­му при­вер­не­ны и кото­рые дей листы твер­до­сти на тые имѣ­нья онъ въ себѣ мѣлъ, тые всѣ при смер­ти отца его поги­ну­ли. А онъ въ тотъ часъ дома не былъ и теперь онъ не маєть­ся, гдѣ подѣти и съ чого намъ послу­жи­ти. И билъ намъ чоломъ, абы­х­мо лас­ку нашу ему вчи­ни­ли и на про­ти­ву тыхъ имѣ­ней, кото­рые отецъ его про­тивъ отчиз­ны сво­ей у Полоц­ку дер­жалъ, пожа­ло­ва­ли и дали ему спа­декъ зрад­цы наше­го кня­зя Пет­ра Гор­ча­ка, кото­рый до Моск­вы втекъ, то есть, жере­бей Голен­чиц­кій въ Камен­цы, на кото­ромъ шесть бра­товъ мѣш­ка­ло, на имя: Юсъ, Илко, Луцъ, Тоцъ, Аса­ко­вичъ, все­го ихъ пять дымовъ. A шостый братъ ихъ оттоль прочь сбѣгъ. А двѣ зем­ли пустов­скихъ въ Горо­дис­чи, на имя, Меле­хов­щи­ну а Зен­ков­счи­ну, кото­рые тому жъ Пет­ру Гор­ча­ку на паш­ню были при­да­ли, гдѣ жъ и вое­во­да Полот­скій мар­ша­локъ нашъ панъ Янъ Юре­вичъ Глѣ­бо­вичъ передъ нами повѣ­дилъ, ижъ кото­рые имѣ­нья отецъ его у Полот­ску дер­жалъ, тогды, по смер­ти его, ку зам­ку Полоц­ко­му тые имѣ­нья при­вер­не­ны и теперь ихъ ку зам­ку дер­жать. А инщіе бояре тамош­ніе разо­бра­ли, о чомъ жо и коро­ле­вая наща ее милость вели­кая кня­ги­ни Бона насъ за нимъ жода­ла, абы­х­мо тымъ спад­комъ его пожа­ло­ва­ли. Ино мы, зъ лас­ки нашое, на при­чи­ну коро­ле­вое нашое ее мило­сти и на чолом­би­тье его, то есмо вчи­ни­ли. Оный спа­докъ, кото­рый зрад­ца нашъ Гор­чакъ дер­жалъ, то есть, оный жере­бей Голен­чиц­кій, съ тыми людь­ми вышей­ме­не­ны­ми, и съ тыми двѣ­ма зем­ля­ми пустов­ски­ми на Горо­дис­чу ему есмо само­му и жонѣ и дѣтемъ его дали и даемъ до отчи­ще­нья отчиз­ны его. Кото­рый жо спа­докъ маеть онъ на себе дер­жа­ти и вжи­вать со всимъ съ тымъ по тому, яко и тотъ зрад­ца нашъ Гор­чакъ дер­жалъ. А маеть служ­бу зем­скую оттоль засту­по­ва­ти. И на то дали есмо ему сесь нашъ листъ, до кото­ро­го и печать нашу при­ло­жить казали.

Писанъ у Виль­нѣ. Лѣта Боже­го Наро­же­нья 1541, мѣсе­ца Октеб­ря 2 день, индиктъ 15. Спра­ва пана Михай­ла писаря.