1493.08.24. Підтверження окольнічему смоленському князю Тимофею Володимировичу на именья в Смоленском повете Радощинна

1493.08.24. Potwerżenie okolniczomu smolenskomii kniaziu Tymofieju Wolodymiryczu na imena w Smoleńskom powete na imia Radoszczynu etc., na wecznost.
Александръ.
Билъ намъ чоломъ околь­ни­чий смо­лен­ский кн(я)зь Тимо­фей Воло­ди­ме­ро­вичъ. Поло­жилъ передъ нами листъ небо­щи­ка отца н(а)шого коро­ля его м(и)л(о)сти, што далъ сму име­нье в Радо­щине и люди ново­сел­ки у Смо­лен­скомъ пове­те, што передъ тымъ был дан писа­ру сво­е­му небо­щи­ку Мики­те, а по смер­ти Мики­ти­но дан ему, со всимъ тымъ, какъ Мики­та дер­жалъ. Ино какъ Мики­та умер и сест­рен­ци его
Мить­ко и з бра­тьею его при­е­ха­е­ши к намъ съ ста­ры­ми листы отца н(а)шого, што былъ далимъ тое име­нье по живо­те дяд­ка ихъ Мики­тине, упро­си­ли в нас за отчи­ма кн(я)зя Тимо­фе­е­вы­ми. И тыми разы княз Тимо­фем сто­ялъ с ними оче­ви­сто передъ нами и поло­жилъ передъ нами листъ отца н(а)шого, ижъ отецъ н(а)шъ тотъ листъ свом самъ зла­малъ, кото­рымъ был дал тое име­нье сест­рен­цомъ Мики­ти­нымъ по его живо­те, а тое име­нье взялъ его м(и)л(о)сть на свою волю. И мы, о томъ досмот­рев­ши, при­су­ди­ли есмо тое кн(я)зю Тимо­фею под­ле дани­ны и листу отца н(а)шого со всимъ с тымъ, какъ Мики­та деръ­жалъ. И про­сил нас кн(я)зь Тимо­фем, абы­х­мо ему тое име­нье Рад­щи­ну и люди ново­сел­ки потвер­ди­ли н(а)шимъ листомъ, дани­ну отца н(а)шого.
И мы то потвер­жа­емъ ему и его детемъ, и потомъ будучимъ его щад­ком, веч­но. А на твер­дость того и печать н(а)шу каза­ли есмо при­ве­си­ти к сему н(а)шому листу.
П(и)сан в лет 7001, м(е)с(е)ца авгус(та) 24 ден, инъдик(т) 11.
Пр(авил) во(евода) тр(оцкий), м(а)р(шалок) зем­ский), п(а)н П(е)т(р) Яно­вич. || [82]

Пуб­ліка­ція: Lietuvos Metrika. Номер кни­ги 3: (1440–1498): Литов­ский инсти­тут исто­рии; [под­го­тов­ле­но Линой Ану­жи­те, Аль­гир­да­сом Балюли­сом]. — Виль­нюс. – 1998. – №21.