Подл. 17,7X14,5. Голов. 7. Датируется временем княжения в Угличе кн. Дим. Юрьевича Шемяки.[Зимин А. А. Витязь на распутье: Феодальная война в России XV в. — М.: Мысль, 1991. — С. 235]. Грамота крайне ветха, конец её не сохранился, с оборота подклеена бумагой и в двух местах полосками белого шёлка. Недостающий текст восстановлен по списку кн. 527. На обороте пометки (почерками XVI—XVII вв.): «На село Удинское. Углеч (по первым главам), …>».
Списки: АТСЛ, в кн. 527, 528, 529 № 152.
Публ.: ААЭ, I, № 28; АЮБ, I, № 31—IV; Пам. № 47; Акты социально-экономической истории Северо-Восточной Руси конца XIV — начала XVI века (АСЭИ). Том I. — М.: Издательство Академии наук СССР, 1952. — № 115. С. 91–92.
С(вя)тыя деля Троици, се яз, кн(я)зь Дмитреи Юрьевич(ь), пожаловал есмь игумена с братиею, или по нем кто иныи игумен будеть. Что их села и с деревн(я)ми в моеи вотчине на Оуглеч(е) в Кинеле Оудиньское и з деревнями, [да Здви]женьское з деревнями, да во Кью [Перетержское с пустошми, а в Городском стану деревни — Богоявленская] деревня, Баскача деревня, Шулгиньская деревня, Репоховьскии две пустоши, дают мне с теx селъ и з деревень оброком в мою казну на всякои год на Р(о)ж(е)ство Х(ри)с(то)во по три рубли. А кого к собе перезовут люд(и)и из-ыных княженеи, а не из моеи вотчины — из Углеч(а) поля и изо всех Оуглечьскых волостеи, и тем людем в тот же оброк потянути. А опроч(ь) тог(о) оброка, не надобе им моя дань никоторая, ни пи[счая белка], ни ям, ни подвода, ни мыт, ни тамга, ни восминичее, ни костки, ни [и]ная никоторая пошлина, опроч(ь) тог(о) дела, коли оучнут город рубити, и им делати же; ни двора моег(о) не ставити, ни коня не кормити, ни закосъ им не надобе, ни къ дворьскому, ни къ сотнику не надобе им тянути ни во что. А намесници мои оуглечскыи и волос[тели] и их тиоуни не всылают в те села и в деревни к тем лю[дем], ни их судят, опроч(ь) д(у)шегубьства, ни кормов своих на них не ем[лют, ни прав]едщик, ни доводщик оу тех люд(и)и побора не берут. А пятенщики мои къ ним не въездить, а конев оу них, ни иныи животины не пятнят. А деръжить игуменъ оу своих люд(и)и оу манастырьскых пятно свое; а прикажеть своем(у) чернцю Троицьког(о) манастыря, хто оу них в Прилуце строитель ни будет, и тот старе[ц] пятно держить оу себя; а хто люд(и)и манастырьских минить лошад(ь) или купить, и онъ запят[н]ит оу своег(о) старца, а моем(у) пятенщику в том нетъ ничег(о). А ведает и судит теи люди свои игуменъ сам, или кому прикажеть. А смешается суд моим людем городцьским [или волостным с монастырскими людьми, и наместницы мои судят, а игумен с ними, или кому прикажет. А будет прав или виноват монастырскои человек, и он в правде и в вине игумену, а наместником моим и волостелем и их тиуном в том ничего. А будет прав или виноват мои человек волостнои или городскои, и их в том судят мои наместники и волостели, а игумену ся в то не вступати ни во что.
А через сю мою грамоту кто на них что возьмет или их чем изобидит, и ему быти от меня в казни.
А на которые грамоты грамоту свою дам, а на сю грамоту иные моеи грамоты нет.]
На обороте подлинной вверху: «Тимофеи Олександрович(ь)».
