Оригинал: РГАДА, разряд XXVII, «Приказ Тайных Дел», № 2. Это экземпляр, выданный тверской стороной. Пергамен с привешенной печатью на желтом воске.
Копия 1 (XVI в.). РГАДА. Ф. 389 (Литовская Метрика), оп. 1, кн. 5 (5‑я книга записей), л. 294–294 об.
Публікації: Грамота неоднократно публиковалась по копии из Литовской Метрики. По оригиналу опубликована в изданиях: Срезневский И.И. Сведения и заметки о малоизвестных и неизвестных памятниках. Приложение к XXII-му тому Записок Имп. Академии наук, № 3. [XLV-LIV]. СПб., 1873. С. 215–216, № LIV; Духовные и договорные грамоты великих и удельных князей XIV-XVI вв. М. — Л., 1950. С. 62–63, № 23. — Электронная версия сделана по последней публикации. О.Лицкевич. Fontes historiae Magni Ducatus Lithuaniae; starbel.by/dok/d033.htm, 2009.XII.06.
Се язъ, кнѧзь велики Борисъ Александровичь тфѣрьски, взѧлъ есмь любовь таковоу с своим г(о)с(поди)н(о)мъ, з дѣдомъ, великимъ кн(ѧ)з(е)мъ Витовтомъ литовьским и многихъ Русьскихъ земль господаремъ.
Быти ми с нимъ заѡдинъ, при его сторонѣ, и пособлѧти ми емоу на всѧкого, никого не вымая. А г(о)с(поди)ну моему, дѣду, великомоу кн(ѧ)зю Витовту, мене, кн(ѧ)зѧ великого Бориса Александровичѧ [тфѣрьскова] боронити ѡто всѧкого, думою и помочью.
А в земи и в воды, и во все мое великое кнѧженье Тфѣрьское моему г(о)с(поди)ну, дѣду, великому кн(ѧ)зю Витовту, не вступатисѧ.
А дѧдѧмъ моимъ, и братьи моеи, и племени моему, кн(ѧ)з(е)мъ, быти в моемъ послусѣ. Яз, кн(ѧ)зь велики Борисъ Александрович, воленъ, кого жалую, кого казню, а моему г(о)с(поди)ну, дѣду, великому кнѧзю Витовъту, не вступатисѧ. А которыи всхочет к моему г(о)с(поди)ну, дѣду, к великому кнѧзю Витовту, со ѡчиною, и моему г(о)с(поди)ну, дѣду, великому кн(ѧ)зю Витовтоу, со ѡчиною не приимати. Поидетъ ли которыи к моему г(о)с(поди)ну, дѣду, к великому кн(ѧ)зю Витовту, и ѡнъ ѡчины лишенъ, а во ѡчине его воленъ яз, кн(ѧ)зь велики Борисъ Александрович, а моему г(о)с(поди)ну, дѣду, великому кнѧзю Витовту, не вступатисѧ.
А рубежъ ѡчинѣ моего г(о)с(поди)на, дѣда, великого кн(ѧ)зѧ Витовта, по старине. А которыи мѣста порубежныи потѧгли будутъ к Литвѣ или к Смоленьску, а подать будутъ давали ко Тфѣри, ино имъ и н(ы)нечѧ [с. 63] тѧгнути по давному, а подать давати по давномоу. А которы мѣста порубежныи потѧгли будутъ ко Тфѣри, а подать боудутъ давали к [Литвѣ или к Смоленску], ино им и н(ы)нечѧ тѧгнути по давному, а подать давати по давному.
А што оучинитъсѧ межи вашими людми и нашими, и волостели наши оучинѧтъ исправу. А чему наши волостели не учинѧтъ исправы, и намъ, сославсѧ, да оучинити исправа без перевода. А землѣ, и водѣ, и всему ѡбидному дѣлу межи нас соудъ ѡпчии.
А што будетъ учинилосѧ в нашеи любви и в наших перемирьях, тому всему судъ и исправа без перевода. А судити судьямъ ѡпчимъ, целовавъ кр(е)стъ. А ѡ што сѧ сопруть судьи, ино положити имъ на моего г(о)с(поди)на, дѣда, великого кн(ѧ)з(ѧ) Витовта. А суженое, заемное, положеное, поручное ѡтдати по исправѣ. А холопа, робу, должника, поручника, татѧ, разбоиника выдати по исправѣ.
А людемъ нашимъ, гостемъ, гостити межи насъ путь ч(и)стъ, без рубежа и без пакости. А пошлину имати с моих людеи в моего г(о)с(поди)на, дѣда, великого кн(ѧ)зѧ Витовта, ѡчине, в Смоленьску, в Витебску, на [Киеве], в Дорогобужи, в Вѧзмѣ, и по всему его великому кнѧженью, по давному, а нового не примышлѧти. А по моеи ѡчинѣ, кн(ѧ)зѧ великого Бориса Александровича, пошлины имати с людеи моего г(о)с(поди)на, дѣда, великого кн(ѧ)зѧ Витовта, во Тфѣри, в Кашинѣ, в Городку, в Зупцевѣ, и по всему моему великому кнѧженью, по давному, а нового не примышлѧти.
А на семъ на всемъ язъ, кн(ѧ)зь велики Борисъ Александровичь, дал есмь правду своему г(о)с(поди)ну, дѣду, великому кнѧзю Витовту, и кр(е)cтъ целовалъ к нему.
А по сеи ми грамотѣ правити.
А п(и)сано во Тфѣри, в лѣт(о) 6000-ное девѧть[сотное 3]5, авгус(та) 3 д(е)нь, индикта 5.
На обороте: «Докончане великого кн(ѧ)з(ѧ) тверского Бориса з великим кн(ѧ)зем Витовтом в лет(о) 6905, августа 3 дня».
Інформації про печатки немає
Релятівні категорії документів
- Тверські (1)