Жигимонтъ Третий божъю млстъю Корол Полский Великий Княз Литовский Руский, Пруский, Жомойтский, Мазовецкий, Ифлянтъский и Шведский и Готский, Вандалский дедичний король.
Ознаймуемъ чинимо ведомо, иж постановившыся очевисто перед нами гсдрем до книгъ нашых канцелярских [князъ Юрий Абрамовичъ Путятича Друцкий Горский] покладал листъ свой водле права посполитого справленыи урожоному князю Федору Григоревичу Друцкому Горскому, брату его стриечному , именъе называемое Орев в повете Оршанском лежачое вечъностъю даний, прызываючи все то што в томъ листе описано естъ быт нам гсдру [абы] есмо то до ведомости нашой прыпустившы до книг нашых канцелярских вписаты росказали и листом нашым тое сознанъе его утвердили. Которой запис урожоного князя Федора Друцкого Горского до книг канцелярии и в листъ нашъ вписуючы слово от слова так ся в собе маетъ: Юрий Абрамовичъ Путятича Друцкий Горский чыню явно и вызнаваю тым моим доброволнымъ вызнанымъ вечистымъ листом записомъ кождому кому бы того ведати належало нинешним и на потом будучым иж не будучи никим намовленый але з доброе воли свое знаючы млстъ упреймъ против себе брата своего стрыечъного его млсти князя Федора Григоръевича Друцъкого Горского а хотечы тую упреймую млсти его млсти млстъю своею отдати и нагородити а ужываючы волности шляхетское в праве посполитом и в конституцыях описанное [именъями] отчизнами своими шафовати [заводити, заменити] именъе мое отчизное в повете Оршанъскомъ лежачое прозываемое Оревъ по отцу мне правом прырожономъ спалое а от паней матки моее кнесны Абрамовое Горское кнежны Василисы Масалское от давных часовъ в суме пенезей небощыку кнзю Богдану Соколинскому заведенное а так я маючы взгляд на млстъ впредречоного брата моего и хотечы его тым болшъ ку млсти своей мети позволил есми и тым листомъ моим позволяю тое именъе Оревъ у потомков князя Богдана Соколинского и у кого быт правом тым заведено было выкупити и зо всим тым яко то небощык годное памети нашои держалъ и освободавшы на себе держати ужывати вшелякые пожитки [привлашаючы] [розширатъ] и водлугъ воли и уподобанъя своего тым шафовати вечъне ни чым навеки не порушно.
А то естъ самое именъе Оревъ з двором з будованемъ дворнымъ, зъ кгрунъты вшелякими, с пашнею дворною зъ шляхтою з бояры и куничниками подданими всими [их повинностями] здавна к тому именъю належачыми с пущами с полми зъ селы зъ сеножатъми з гаи з боры с пустошами зъ ставы и млыны и зъ их вымелками. Такъ же менованое яко и не менованое огулом все такъ яко в розбраню [нашимъ] небощыкъ княз Абрам Федоровичъ от брата своего деръжал, уживал и прыбавлял ни чом на себе жону дети потомъки по мне позосталые не зоставуючы, огулом того своего именъя, к нему належностей вечъне се вырекаю и все право прырожоное и набытое к тому именъю слухаючое и на се его млсти князя Федора Горского доброволне жоне и дети и потомъки его млсти даю дарую и вливаю. Воленъ его млстъ будетъ а по немъ потомъки его млсти … [держати] ужываючы оное водлугъ воли свое оборочати, продати, отдати даровати кому хотечи записати и водлугъ воли свое тым шафовати яко одно воля его млсти будетъ. А я вже такъ самъ в тое помененое именъе Ореву яко и потомки мои вступовати и переказы чынити и трудности жадное задавати не маю и мочы не буду вечъными часы.
И на тотъ дар его млсти князю Федору Друцъкому Горскому сесъ мой под моею печатю и с подписом власное рукы моее. А пры томъ были и на того добре ведоми и за устною і очевистою прозбою мое печати свое прыложыти и руками подписати рачили млсти панове и прыятели ясновелможный панъ Ероним Ходкевичъ каштелян виленъский староста берестейский, его млстъ панъ Александер Ходкевичъ кграбя на Шклове и Мышы, а его млстъ пан Миколай Глебович староста окиншенъский.
Писанъ у Варшаве року по нароженъю Исуса Христа сына божего тисеча шестсотного мсца марца пятогонадцат дня. У того листу печатей прытысненых чотыры и подписы рукъ писмомъ полскимъ тымы словы
Ierzy Druckі Horski ręką własną,
Heronim Chodkiewieсz kosztelan wilenski ręką swą pieczętarz oczewisto proszony,
Alexander Chodkiewicz hrabia na Szkłowie y Myszy z Bychowa ręką swą własną preszony pieczętarz
Mikołay Hlebowicz na Dabrownie ręką swą własną podpisał y pieczęc przyłozył.
Которое очевистое и доброволное сознане урожоного князя Юря Абрамовича Друцъкого Горского и тотъ листъ
за прозбою его до книгъ нашых канъцелярыйских и в сесь выпис нашъ естъ вписано. А по записаню Мы гсдръ з ласки нашое гсдръское тот дар вливокъ права от урожоного князя Юря Друцъкого Горского урожоному кнзю Федору Друцъкому Горскому учыненый во всемъсим листом нашымъ утвержаемъ. Маетъ урожоный князъ Федор Друцъкий Горский тое именъе Ореву у деръжачых окупивъши и освободивъшы на себе сам, жона, дети и потомъки его держати водле того права своего ужывати и тым яко властъностъю своею шафовати, не будучы повинъни с того никоторое повинъности ни кому полнити толко службу земскую военъную заровно з ынъшими обывателми Великого Князства Литовского заступовати. И на то есмо дали урожоному кнзю Федору Грыгоревичу Друцъкому Горскому сесъ нашъ листъ с подписомъ руки нашое гсдрское. До которого и печат нашу Великого Князства Литовского прывесити росказалиесмо. Писанъ у Варшаве лета божего нароженъя тисеча шестъсотного мсца марца двадцатъ пятого дня панованъя панствъ нашых полского и литовъского трынадцатого, а шведского семого року.
Sigismundus rex
[Ярошъ Воло]вич подскарбий на:[двор]ный и писарь
М.П.
На звороті:
1600 marce 25 dnie ohis veyhego w e[nam] a[nno] mil[lessino] sexcentesimo martii 25 dnie w Kancellaryi W[iękney] WXLitt przysnanego Extrakt prawa Wieczystego od kniazie Ierzego Awramowicza Putiatycza Horskiego kniaztowi Fedorowi Horskiemu danego Na m[aie]t[no]ść Orawę cum attinentiis w p[owie]tie Orhan[skim] [dziediczne] ktyra m[aie]t[no]ść cum attinentiis buła ot [iego] m[iłosci] kniahini Wasilisy Abramowiei Horskiego zastawione kniaziu Bohdanowi Sokolińskiemu
[Ktyra cum attinentiis buła zastawione]Za numę 700 kop gr[oney] lit[ewskich]
№ H. 71
Pet[rus] Brolnicky
1600 Prawo wieczyste [dziediczne] na Orew od k[niazia] Ierzego Abramowicza Horskiego
[pusewnę] w zastawę od p[ani] matki iego kniaziu Bohdanowi Sokolińskiemu
Fastykuł s Rawskoch głownych spraw wedłuy reistru.